နိုင်ငံရေး တက်ကြွလှုပ်ရှားသူများ၏ အမှုများတွင် လိုက်ပါ ဆောင်ရွက်ပေးခဲ့သော မြန်မာရှေ့နေ ၂ ဦးအား စစ်အစိုးရက အရမ်းကာရော ထောင်ဒဏ်ချခြင်းကို ဒေသဆိုင်ရာ လူ့အခွင့်အရေးအဖွဲ့တခုက ပြစ်တင်ရှုတ်ချလိုက်ပြီး၊ ချက်ချင်း လွှတ်ပေးရန်လည်း တနင်္ဂနွေနေ့က တောင်းဆိုလိုက်သည်။

ပြီးခဲ့သောနှစ် အစိုးရဆန့်ကျင်ရေး ဆန္ဒပြပွဲများတွင် ပါဝင်ခဲ့သဖြင့် ဖမ်းဆီး ရုံးတင်ခံရသည့် နိုင်ငံရေး တက်ကြွလှုပ်ရှားသူ အမှုသည်များကိုယ်စား တရားရုံးတွင် လိုက်ပါဆောင်ရွက်သောကြောင့် ထောင်ဒဏ်ချခံရသော တရားရုံးချုပ် ရှေ့နေများ ဖြစ်ကြသည့် ဦးခင်မောင်ရှိန်နှင့် ဦးအောင်သိန်းတို့ကို လွှတ်ပေးရန် အာရှ လူ့အခွင့်အရေး ကော်မရှင် (AHRC) က တနင်္ဂနွေနေ့က ကျင်းပခဲ့သည့် အတိုင်ပင်ခံ အစည်းအဝေးအတွင်း တောင်းဆိုခဲ့ခြင်းဖြစ်သည်။

"တရားရုံးချုပ်ရှေ့နေ ၂ ဦးကို ထောင်ဒဏ်အပြစ်ပေးခြင်းသည် အရမ်းကာရော ထင်ရာမြင်ရာ လုပ်ရပ်ဖြစ်သည်ဟု ယူဆရမည်။ ယခုအစည်းအဝေး တက်ရောက်နေသော ဂျူရီလူကြီးများ၊ ရှေ့နေများ၊ ဥပဒေပညာရှင်များက ဦးအောင်သိန်းနှင့် ဦးခင်မောင်ရှိန်တို့ကို ချက်ချင်းလွှတ်ပေးရန် တောင်းဆိုအပ်ပါသည်" ဟု ထုတ်ပြန်ခဲ့သည့် သတင်းထုတ်ပြန်ချက်တွင် AHRC က ပြောသည်။

တရားစီရင်ရေးကို မယုံကြည်သဖြင့် တရားရုံးနှင့် ပူးပေါင်းဆောင်ရွက်မည် မဟုတ်တော့ကြောင်း အမှုသည်များ၏ တင်ပြချက်ကို အမှုသည်များကိုယ်စား လျှောက်ထားတင်ပြခဲ့ပြီးနောက် တရားရုံးချုပ်ရှေ့နေ သူတို့ကို ရန်ကုန်တိုင်း လှိုင်မြို့နယ်တရားရုံးက အောက်တိုဘာလ ၆ ရက်နေ့တွင် တရားရုံးကို မထေမဲ့မြင်ပြုမှုဖြင့် ထောင်ဒဏ် ၄ လစီ အပြစ်ပေးခဲ့သည်။

သူတို့သည် မြန်မာနိုင်ငံမှ လုပ်သက်နှင့် အတွေ့အကြုံ နှစ်ပေါင်း ၂ဝ ကျော်ရှိသော ရှေ့နေကြီးများဖြစ်ကြပြီး၊ ၂ဝဝ၇ ခုနှစ် စက်တင်ဘာလ ဆန္ဒပြပွဲများနှင့် စပ်လျဉ်း၍ ဖမ်းဆီး တရားစွဲဆိုခြင်း ခံရသော အမှုများတွင် တရားခံများဘက်မှ အကျိုးဆောင်ပေးသူများ ဖြစ်သည်။ ဤအမှုသည်များထဲတွင် အမှု ၅ မှုခွဲ၍ တရားစွဲဆိုခံရသော ကိုထွန်းထွန်းဦး၊ ကိုမောင်မောင်လတ်၊ ကိုအောင်ကျော်မိုးနှင့် မထားထားသက်တို့လည်း ပါဝင်သည်။

မြန်မာနိုင်ငံ၏ တရားစီရင်ရေးစနစ်သည် စစ်အစိုးရ၏ ခြယ်လှယ်ခြင်းကို ခံနေရပြီး နှစ်ရှည်ထောင်ဒဏ်များ ချမှတ်ခြင်းဖြင့် နိုင်ငံရေး တက်ကြွလှုပ်ရှားသူများကို ခြိမ်းခြောက်နေသည်။ သာမန်ရာဇဝတ်မှုများမှာမူ လာဘ်ထိုးရုံဖြင့် အလွယ်တကူ လွတ်မြောက်နိုင်သည်ဟု AHRC ၏ မြန်မာနိုင်ငံဆိုင်ရာ ပြောရေးဆိုခွင့်ရှိသူ ဦးမင်းလွင်က ပြောသည်။

"အခုလက်ရှိ မြန်မာနိုင်ငံမှာ ဖြစ်နေတဲ့ တရားစီရင်ရေးစနစ်က ရာဇဝတ်မှုတွေဆိုရင် ငွေနဲ့ လိုက်လို့ရတယ်။ နိုင်ငံရေးမှုတွေကျတော့ ဘာမှညှာတာတာ မရှိဘူး။ ပြစ်ဒဏ်အကြီးကြီးတွေ ပေးလိုက်တာပဲ" ဟု AHRC အတိုင်ပင်ခံ အစည်းအဝေးတွင် မြန်မာနိုင်ငံနှင့် စပ်လျဉ်းသည့် ကိစ္စရပ်များကို တင်ပြဆွေးနွေးခဲ့သူ ဦးမင်းလွင်က ပြောသည်။

ဤသို့ ထောင်ဒဏ်ချမှတ်ခြင်းခံရသော မြန်မာရှေ့နေများကို လွှတ်ပေးရန် တောင်းဆိုပြီး၊ မြန်မာစစ်အစိုးရကို ဝေဖန်ခဲ့သည့် AHRC ၏ အစည်းအဝေးကို နိုဝင်ဘာလ ၁၇ ရက်မှ ၂၁ ရက်နေ့အထိ ဟောင်ကောင်တွင် ကျင်းပခဲ့ခြင်း ဖြစ်သည်။ ထို ၄ ကြိမ်မြောက် ဥပဒေစိုးမိုးရေးဆိုင်ရာ အာရှပဋိညာဉ်စာချုပ် ဒေသဆိုင်ရာ အတိုင်ပင်ခံ အစည်းအဝေးသို့ ဂျူရီလူကြီးများ၊ ရှေ့နေများနှင့် ဥပဒေပညာရှင်များ စုဝေး တက်ရောက်ခဲ့ကြသည်။

"ဒီအစည်းအဝေးမှာ မြန်မာနိုင်ငံရဲ့ ဥပဒေစိုးမိုးရေးဆိုင်ရာ အခြေအနေအပေါ် အလွန်အမင်း စိုးရိမ်ပူပန်ကြကြောင်း ထုတ်ဖော်ပြောဆိုခဲ့ကြပါတယ်။ အမှုတွေ စစ်ဆေးရာမှာ ပြစ်မှုဆိုင်ရာ ကျင့်ထုံးဥပဒေ ပြဋ္ဌာန်းချက်တွေကို လုံးဝ ဘေးချိတ်ပြီး တရားခံတွေ ရသင့်ရထိုက်တဲ့ အခြေခံအခွင့်အရေးတွေကို မပေးဘဲ ထားခဲ့တာတွေကို ကြားသိခဲ့ရပါတယ်။ တရားရုံးတွေရဲ့ စီရင်ဆုံးဖြတ်ချက်တွေဟာလည်း နိုင်ငံရေး အကျိုးစီးပွားအပေါ် အခြေခံပြီး၊ လုပ်ထုံးလုပ်နည်းတွေနဲ့လည်း မညီကြောင်းလည်း တွေ့ရှိခဲ့ရပါတယ်" ဟု AHRC က ပြောသည်။
mizzima သတင်းမှ ကူးယူသည်